fot. nadesłane

– Tëch, co gôdają, że wszëtkò wiedzą, jô sã prosto rzec bòjã – piãkną kaszëbizną gôdô Stanley Pecoski (Piechòwsczi) z Round Lake.

fot. nadesłane
fot. nadesłane

No zdanié òstało wërzekłé w sobòtnym (7 séwnika)  programie ò nazwie Radio Kaszëbë w môlowi radiowi stacji Radia Renfrew w prowincji Òntario w Kanadze. Renfrew je pòwiatowim miastã dlô Kaszëbów, co mieszkają w dwùch gminach Madawaska Valley ze stolëcą w Barry’s Bay i Killaloe Hagarty Richards ze stolëcą w Killaloe. Centralnym miastkã Kaszëbów je Wilno, jaczé je pò pòłowie w kòżdi gminie.

Jegò mieszkańca (pò stronie gminë Madawaska) je midzë jinszima David Shulëst, òd czile lat bùrméster ti gminë, a piérwi przez wiele lat przédnik stowôrë, co dzejô dlô zachòwaniô kaszëbsczi spôdkòwiznë, a nazéwô sã Wilno Heritage Society. Òn je téż – na zmianã z Rayã Czôpiewsczim – prowadnikã w Radio Renfrew kaszëbsczégò programù. Je òn pùszcziwóny w kòżdą sobòtã w gòdzënach òd 8 do 10. Gòscama radiowégò zéńdzenia 7 séwnika bëlë Eùgeniusz Prëczkòwsczi z córką Weróniką. Program béł prowadzony pò anielskù i pò kaszëbskù. Òbëdwòje gôdelë ò swòjich doswiôdczeniach, jaczé mielë òbczas dwùch niedzel bëcégò w Kanadze.

– Më mielë kòl piãtnôsce zéńdzeniów z Kaszëbama. Mómë pòrobioné nagrania telewizyjné. To czasã nie je do wiarë, jak bëlno òni gôdają w rodny mòwie. Wierã nôlepi rozmieje gadac Alojzy Lorbiecczi. Òn robi téż wiele na kòmpùtrze. Mô zrobioné dokôz, w chtërnym mô ùjãté kòl 26 tësący lëdzy, co w dzejach i terô mieszkają w Wilnie. Są w nim podóné datë żëcégò, rodzynné łączbë i jesz wiele jinszi wiédzë ò nich. Tak jak òn, piãkno téż gôdają: Aloysius Blanc, Stanley Piechòwsczi, Danny Etmańsczi, Benny Kùczkòwsczi i czile jinszich – gôdôł w radio Prëczkòwsczi.

– Przë ti leżnoscë jô ùczëła wiele słów, chtërnëch ù nas sã ju mało ùżiwô abò nijak nie ùżiwô, przikładowò: płôtny – wôżny, juńc- młodi biczk, szlachòwac – bëc pòdobnym, wërwas – szpëtôczel, galimatias, piérwi – przódë i wiele jinszich – dodôwa Werónika Prëczkòwskô.

W programie pùszczóné bëło téż wiele sztëczków kaszëbsczich i to tëch, co pòwstałë piérwi, i tëch czësto nowëch. Òsoblëwie pòpùlarnô je tam platka karna „Młodzëzna”.

– Kòżdi mój program kùńczi sã piesnią „Wiedno Kaszëbë” z ti platczi – wëjôsniôł David Shulëst.

Nen sztëczk pòwstôł ekstra na tczã kaszëbsczich emigrantów. Je òn dzys corôz barżi achtniony za wiôlgą wòdą. Prawie terô rëchtëje gò na swòjã pierszą kaszëbską platkã karno „Lëdowô nóta” z Hamilton, jaczé latos mësli jesz skùńczëc nagriwanié do ni. Ò tim karnie téż bëło gôdóné w programie. Grëpã twòrzą nôwicy pòlsczi przëbëcznicë. Dzys je òna nôbëlniészim kùlturalnym promòtorã kaszëbiznë w Kanadze. Za rok mô przëjachac na Kaszëbë w Pòlsce.

– Më bë baro chcelë zaspiéwac na bëlny pòczątk na òdpùsce w Swiónowie, na jaczim – żlë zdążimë – më bë mòglë pòswiãcëc swój nowi propòrc – rzekł przédnik karna, Sławòmir Dudalsczi.

Propòrc robi sã ju na Kaszëbach. Mdze to nastãpné dzeło Indżi Mach z Mądrzechòwa kòle Bëtowa, co pòwstôwô przë wspòmóżce Gabrielë Recë z Tëchòmia. Na westrzódkù propòrca bãdze sztatura Matczi Bòsczi Swiónowsczi.

 – To bądze baro płôtné – dodôwô David Shulëst. – Jak sã nama ùdô, më téż mòże tam bądzemë. Mòże terô z nama pòjedze wiãcy tëch lëdzy, z jaczima sã spòtkelë kaszëbsczi redaktorze z Rodny Zemi.

(Ep)

1 KOMENTARZ

  1. Jesz nie zadżinął Kaszëbów zbiég – też w Kanadze! To je baro dobrze, że óni tam pò kaszëbskù gôdają, bo tak më – bez cëzy mòwë – móżemë sã dogadac.
    Marian

ZOSTAW ODPOWIEDŹ

Proszę wpisać swój komentarz!
Proszę podać swoje imię tutaj

Witryna wykorzystuje Akismet, aby ograniczyć spam. Dowiedz się więcej jak przetwarzane są dane komentarzy.